चितवनको नारायणगढ–मुग्लिङ सडक खण्ड अन्तर्गत सिमलतालमा गत असार २८ गते पहिरोसँगै बगेर त्रिशूली नदीमा दुई वटा बस हराएको एक महिना पुरा भएको छ । वीरगञ्जबाट काठमाण्डौका लागि छुटेको एञ्जल डिलक्स र काठमाण्डौबाट गौरका लागि छुटेको गणपति डिलक्स बसलाई गत असार २८ गते शुक्रवार बिहान सिमलतालमा खसेको पहिरोले बगाएर त्रीशुलीमा बेपत्ता बनाएको थियो ।
बेपत्ता बसमा सवार रहेका ६५ जनामध्ये तीन जना नदिबाट पौडीयर सकुशल निस्किएका थिए भने ६२ जना बेपत्ता भएका थिए । उक्त दुर्घटनामा बेपत्ता भएका मध्ये अहिलेसम्म विभिन्न ठाउँबाट २४ जनाको शव फेला पारिएको छ । घटनाको एक महिना पूरा हुँदा पनि बेपत्ता दुई वटा बस र ३८ जना यात्रुको अवस्था अहिलेसम्म अज्ञात रहेको छ ।
त्रिशूलीमा बेपत्ता बस र यात्रु खोज्न नेपालमा रहेका प्राबिधिक टोलिले सम्भव नभएपछि भारतबाट समेत प्राविधिकहरूको टोली आएको थियो । भारत बाट आएको प्राबिधिक टोलीले समेत बेपत्ता बस र यात्रुउको कुनै पत्ता लगाउन नसकेपछि साउन १३ गते भारतीय टोली फर्केको थियो ।भारतीय उद्धार टोलि फर्के संगै पहिलो चरणको खोजी कार्य सकिएको घोषणा भएको थियो । नेपाली सुरक्षाकर्मीको टोलीले त्यही दिनदेखि दोस्रो चरणको खोजी जारी राखेको छ ।
सिमलताल दुर्घटनाका विषयमा अध्ययन गर्न सरकारले गृह मन्त्रालयका सहसचिव छवि रिजालको संयोजकत्वमा कार्यदल बनाएको थियो । कार्यदलले यही साउन २२ गते मङ्गलवार प्रतिवेदन बुझाएको छ । अध्ययन कार्यदलले नारायणगढ–मुग्लिन सडकभन्दा माथि बनेको ग्रामीण सडकका कारण सिँदुरेगैरामा थुप्रिएको लेदो र ग्रेगान अत्यधिक पानी परेपछि सडकमा बग्दै आएर बस खसालेको निष्कर्ष निकालेको थियो ।
ग्रामीण सडक बनाउँदा भरतपुर महानगरपालिकाले समग्र वातावरणीय पक्षमा ध्यान नदिएको, पहिरोले थुनिएको कल्भर्ट सफा गर्न भरतपुरको डिभिजन सडक कार्यालयले पनि ध्यान नदिएको कार्यदलको प्रतिवेदनमा उल्लेख छ ।कार्यदलले खोजी तथा उद्धारलाई समय अनुकूल बनाउन विभिन्न औजार, उपकण र आधुनिक प्रविधि उपलब्ध हुनुपर्ने लगायतका सुझाव दिएको छ ।
