काठमाडौं – जनकपुर बोल्ट्सले पहिलो संस्करणको नेपाल प्रिमियर लिग (एनपीएल) क्रिकेटको उपाधि जितेको छ। आज त्रिवि क्रिकेट मैदानमा भएको रोमाञ्चक फाइनल खेलमा जनकपुरले सुदूरपश्चिम रोयल्सलाई ५ विकेटले पराजित गर्दै एनपीएल च्याम्पियन बनेको हो।
सुदूरपश्चिम रोयल्सले प्रस्तुत गरेको १ सय ८५ रनको लक्ष्य जनकपुरले १९.२ ओभरमा मात्र पूरा गर्यो। जनकपुरका लागि ब्याट्सम्यानहरूको उत्कृष्ट प्रदर्शन खेलको मुख्य आकर्षण रह्यो।
यसअघि, टस जितेर पहिले ब्याटिङ गरेको सुदूरपश्चिमले २० ओभरमा ९ विकेटको क्षतिमा १ सय ८४ रन बनाएको थियो। तर, उपाधि जित्न असफल हुँदै उपविजेतामा सीमित रहनुपर्यो।
प्रतियोगिताको विजेता जनकपुर बोल्ट्सले ट्रफीसहित नगद १ करोड १० लाख रुपैयाँ प्राप्त गरेको छ। उपविजेता सुदूरपश्चिम रोयल्सले ५१ लाख रुपैयाँ पुरस्कार पायो। यसैगरी, तेस्रो स्थानमा रहेको कर्णाली याक्सले २५ लाख र चौथो भएको चितवन राइनोजले १५ लाख रुपैयाँ हात पारे।
एनपीएलको पहिलो संस्करणले नेपाली क्रिकेटमा नयाँ ऊर्जा थपेको छ। फाइनल खेललाई हेर्न ठूलो संख्यामा समर्थकहरूको उपस्थिति रहेको थियो।
