काठमाडौँ — जिल्ला प्रशासन कार्यालय काठमाडौँले चाडपर्वको समयमा शान्ति सुरक्षा र सामाजिक मर्यादाको ख्याल गर्दै चाडपर्व मनाउन सबैलाई आग्रह गरेको छ।
जिल्ला प्रशासन कार्यालय काठमाडौँका सहायक प्रमुख जिल्ला अधिकारी अनिल पौडेलले आज जारी गरेको सूचनामा सार्वजनिक स्थानमा होहल्ला, झैझगडा, र मादक पदार्थ सेवन गरेर सामाजिक जनजीवनमा खलल नगर्न सबैलाई सचेत गराइएको छ।
साथै, कानुन विपरीत जुवातास, लङ्गुर बुर्जा, पटाका, र विस्फोटक पदार्थको प्रयोग तथा वितरण नगर्न आदेश दिँदै, त्यस्ता गतिविधिमा संलग्न भएकाहरूलाई कानुनी कारबाही हुने चेतावनीसमेत दिइएको छ।
सूचनामा तिहार र छठलगायतका चाडपर्व मर्यादित रूपमा मनाउन र त्यस्ता कुनै पनि अवाञ्छित गतिविधि देखिएमा तत्काल प्रहरीलाई जानकारी दिन स्थानीय बासिन्दालाई अनुरोध गरिएको छ।
