डोटी: गैर सरकारी संस्था महासङ्घ डोटीको आयोजनामा आइतबार सिलगढीमा सरकारी, गैरसरकारी, र अन्तर्राष्ट्रिय संघसंस्थाबीच समन्वयात्मक बैठक सम्पन्न भएको छ। जिल्ला प्रशासन कार्यालय डोटीको सभाहलमा आयोजित बैठकमा विभिन्न संस्थाका प्रमुख तथा प्रतिनिधिहरूले आफ्ना प्रतिवेदन प्रस्तुत गरेका थिए।
बैठकमा सहभागीहरूले संस्थाहरूका गतिविधि र उद्देश्यबारे जानकारी आदान-प्रदान गर्न पाएकोमा खुसी व्यक्त गरे। उनीहरूले पहिलो पटक यस्तो बैठक आयोजना भएकामा प्रशंसा गर्दै यसको निरन्तरताले जिल्लाका परियोजना र कार्यक्रमहरूलाई अझ प्रभावकारी बनाउने विश्वास व्यक्त गरे।
बैठक प्रमुख जिल्ला अधिकारी (प्रजिअ) मोहनराज जोशीको पहलमा आयोजना गरिएको हो। उनले जिल्लामा क्रियाशील संघसंस्थाहरूका गतिविधिबारे प्रशासन बेखबर रहनुपर्ने अवस्थाको अन्त्य गर्न र संस्थाहरूको कामलाई समुदायमुखी बनाउन समन्वयात्मक बैठकको आवश्यकता रहेको बताए। जोशीले भने, “संस्थाहरूले कुनै पनि कार्यक्रम सञ्चालन गर्दा सरोकारवालासँग समन्वय गर्नुपर्नेछ। यसले कामलाई प्रभावकारी र पारदर्शी बनाउँछ।”
गैर सरकारी संस्था महासङ्घ डोटीका अध्यक्ष लालबहादुर विकले बैठकमा प्रस्तुत सुझाव र सल्लाहलाई आत्मसात् गर्दै यस्ता बैठकलाई निरन्तरता दिने प्रतिबद्धता जनाए। उनले समन्वयले संस्थाहरूको कार्यक्षमता वृद्धि गरी समुदायलाई प्रत्यक्ष रूपमा लाभ पुर्याउने विश्वास व्यक्त गरे।
बैठकले सरकारी र गैरसरकारी संघसंस्थाबीच सहकार्यको वातावरण सिर्जना गर्दै सामुदायिक हितमा योगदान पुर्याउने विश्वास गरिएको छ।
