डोटी – डोटीको बडीकेदार गाउँपालिका–१, डाङस्थित सानुमाया सामुदायिक वन उपभोक्ता समितिले अपाङ्गता भएका व्यक्तिलगायत विपन्न वर्गलाई आर्थिक सहयोग गरेको छ।
सामुदायिक वन दिवसको अवसर पारेर समितिले आफ्ना सामुदायिक वनका ७ जना गरिब, विपन्न, एकल महिला तथा अपाङ्गता भएका व्यक्तिहरूलाई जनही २१ हजार ३३३ रुपैयाँ बराबरको रकम उपलब्ध गराएको हो। उक्त रकम बाख्रापालन व्यवसायमा लगानी गर्न सहयोगस्वरूप प्रदान गरिएको समितिले जनाएको छ।
समितिले वन पैदावारबाट भएको आम्दानीको ३५ प्रतिशत रकम सामाजिक उत्तरदायित्व अन्तर्गत बाख्रापालन कार्यक्रममार्फत वितरण गरेको हो। “सहयोग रकमले उनीहरूको जीवनयापनमा केही सहजता होस् भन्ने हाम्रो उद्देश्य हो,” सामुदायिक वन उपभोक्ता समितिका अध्यक्ष रोजबहादुर कलेलले बताए।
