डोटी । स्थानीय तहहरूको कार्यसम्पादन क्षमता, शासकीय पद्धति, विकास व्यवस्थापन र सेवा प्रवाह सुधार गर्ने उद्देश्यले सञ्चालन भइरहेको स्थानीय तह संस्थागत क्षमता स्वमूल्याङ्कन (LISA) को आर्थिक वर्ष २०८०/८१ को परिणाम अन्तिम रूपमा सार्वजनिक गरिएको छ।
यस स्वमूल्याङ्कनले स्थानीय तहहरूको कार्यप्रक्रिया र उपलब्धिको व्यवस्थित लेखाजोखा गर्ने, सुधार आवश्यक क्षेत्र पहिचान गर्ने, आवधिक समीक्षा गर्ने र आपसी प्रतिस्पर्धा सृजना गर्ने उद्देश्य राखेको छ। यसमार्फत स्थानीय सरकारलाई जिम्मेवार, उत्तरदायी र जनमुखी बनाउन सकिने विश्वास व्यक्त गरिएको छ।
राष्ट्रिय स्तरमा नगरपालिका र गाउँपालिकामा क्रमशः शीर्ष स्थान हासिल गर्ने पालिकाहरूमा नीलकण्ठ नगरपालिका, धादिङ; खैरहनी नगरपालिका, चितवन; तिलोत्तमा नगरपालिका, रुपन्देही; बेनीघाट रोराङ गाउँपालिका, धादिङ; रुरुक्षेत्र गाउँपालिका, गुल्मी; अर्जुनचौपारी गाउँपालिका, स्याङजा रहेका छन्।
डोटी जिल्लाका ९ स्थानीय तहमध्ये जोरायल गाउँपालिकाले ८२.२५ अंक प्राप्त गर्दै पहिलो स्थान हासिल गरेको छ। यससँगै जोरायल गाउँपालिका सुदूरपश्चिमका ८८ स्थानीय तहमध्ये ८औं स्थान र सुदूरपश्चिमका ५४ गाउँपालिकामध्ये दोस्रो स्थानमा पर्न सफल भएको छ।
यस नतिजाले राष्ट्रिय तथा क्षेत्रीय स्तरमा स्थानीय तहको सेवा प्रवाह, योजना कार्यान्वयन, जनउत्तरदायित्व, सुशासन र आर्थिक व्यवस्थापनको अवस्था स्पष्ट पारेको छ। उत्कृष्ट नतिजा हासिल गर्ने पालिकाहरूले आफ्नो कार्यशैली अझ मजबुत बनाउन सक्ने छन् भने अपेक्षित स्तरमा नपुगेका पालिकाहरूले सुधारका रणनीति निर्माण गर्ने अवसर पाउनेछन्।
