डोटी । “भिन्न परिवेश, साझा आकांक्षा” भन्ने मूल नाराका साथ जोरायल गाउँपालिकामा २७औँ अन्तर्राष्ट्रिय युवा दिवस विभिन्न कार्यक्रमसहित मनाइएको छ।
जोरायल गाउँपालिका–३ र ४ मा रहेका नयाँसोच युवा सञ्जाल र सिर्जनशील युवा सञ्जालको आयोजनामा तथा जोरायल गाउँपालिका, सम विकास केन्द्र र एक्सनएड नेपालको सहकार्यमा पालिकास्तरीय कार्यक्रम आयोजना गरिएको हो।
कार्यक्रममा जोरायल गाउँपालिकाका उपाध्यक्ष, जनप्रतिनिधि, प्रमुख प्रशासकीय अधिकृत, शिक्षा शाखा प्रमुख, इलाका प्रहरी कार्यालय जोरायलका प्रतिनिधि, विभिन्न शाखाका प्रमुख तथा कर्मचारी र युवाहरूको सहभागिता रहेको थियो।
कार्यक्रममा लागुऔषध तथा दुर्व्यसन नियन्त्रण, युवाका लागि रोजगारी तथा स्वरोजगारका अवसर, युवा सहभागिता, नेतृत्व विकास र युवासँग सम्बन्धित सवालहरूका विषयमा अन्तरक्रिया तथा छलफल गरिएको थियो। युवाहरूको सहभागितामा विभिन्न सन्देशमूलक नारासहित र्यालीसमेत निकालिएको थियो।
अन्तरक्रियाका क्रममा युवालाई उत्पादनशील तथा सिर्जनात्मक क्षेत्रमा जोड्दै स्थानीयस्तरमै रोजगारी र स्वरोजगारका अवसर सिर्जना गर्नुपर्नेमा जोड दिइएको थियो। त्यस्तै, नीति निर्माण तथा विकास प्रक्रियामा युवाको अर्थपूर्ण सहभागिता सुनिश्चित गर्न तथा युवाका सवाललाई स्थानीय सरकारका योजना र कार्यक्रममा प्राथमिकताका साथ समेट्नुपर्ने धारणा सहभागीहरूले राखेका थिए।
आयोजकका अनुसार अन्तर्राष्ट्रिय युवा दिवस युवाको क्षमता, सिर्जनशीलता र नेतृत्वलाई समाज रूपान्तरणमा परिचालन गर्ने तथा युवाका साझा आकांक्षा र सवाल सम्बोधनका लागि सरोकारवाला निकायबीच सहकार्य र समन्वय बढाउने महत्वपूर्ण अवसरका रूपमा मनाइएको हो।
