काठमाडौं। नेपाल प्रिमियर लिग (एनपीएल) अन्तर्गत एलिमिनेटर खेलमा आज चितवन राइनोज र कर्णाली याक्स् भिड्दै छन्। खेल बिहान ९ बजे कीर्तिपुरस्थित त्रिवि क्रिकेट मैदानमा सुरु हुनेछ।
दुवै टिमले लिग चरणमा उत्कृष्ट प्रदर्शन गर्दै ७ मध्ये ४ खेल जितेर ८ अंकसहित प्लेअफमा स्थान बनाएका थिए। लिग चरणमा चितवनले आक्रामक ब्याटिङ र प्रभावशाली बलिङ प्रदर्शन गरेको थियो भने कर्णालीले सुरूआती दुई खेल गुमाएपछि लगातार चार खेल जित्दै पुनरागमन गरेको थियो।
लिग चरणमा कर्णालीले चितवनलाई १ बल बाँकी रहँदै ४ विकेटले पराजित गरेको थियो। त्यस खेलमा कर्णालीका शिखर धवनले ४५ रन बनाएका थिए। तर धवन अहिले टोलीसँग छैनन्। चितवनले सो हारको बदला लिने र कर्णालीले सोही नतिजा दोहोर्याउने योजनामा छन्।
चितवनले सुदूरपश्चिम र जनकपुर जस्ता बलिया टोलीलाई पराजित गरेको छ। कप्तान कुशल मल्लसँगै शरद भेषावकर, रवि बोपारा, र सोहेल तन्विरको बलियो साथले टोलीलाई सन्तुलित बनाएको छ। बोपाराले ७ खेलमा २३३ रन बनाउँदै प्रतियोगिताका दोस्रो सर्वाधिक रन स्कोरर बनेका छन् भने मल्लले २०२ रन बनाएका छन्।
कर्णालीका विलियम बसिस्टो र चाडविक वाल्टनले क्रमशः ११८ र १२६ रन बनाएका छन्। बलिङमा चितवनका रिजन ढकालले १३ र सोहेल तन्विरले १२ विकेट लिएका छन्। कर्णालीका विपीन शर्मा र बसिस्टोले क्रमशः ९ र ८ विकेट लिँदै प्रभावशाली प्रदर्शन गरेका छन्।
आजको खेल एलिमिनेटर भएकाले पराजित टोली प्रतियोगिताबाट बाहिरिनेछ। विजयी टोलीले दोस्रो क्वालिफायरमा पहिलो क्वालिफायरको पराजित टोलीसँग फाइनल प्रवेशका लागि प्रतिस्पर्धा गर्नेछ।
