शुक्रबार बेलुकी पश्चिमबाट प्रवेश गरेको पश्चिमी वायु र न्यून चापीय प्रणालीको आंशिक प्रभावले सुदूरपश्चिम र कर्णाली प्रदेशका केही ठाउँहरूमा गए रातिदेखि वर्षा र हल्का हिमपात भइरहेको छ।
मौसम पूर्वानुमान महाशाखाका अनुसार, सुदूरपश्चिम, कर्णाली, र कोशी प्रदेशका उच्च पहाडी तथा हिमाली भेगका केही ठाउँहरूमा हल्का हिमपात भएको छ। आज सुदूरपश्चिम प्रदेशका अधिकांश स्थानमा हल्कादेखि मध्यम वर्षा हुने संभावना छ, साथै कर्णाली, कोशी, गण्डकी र बाग्मती प्रदेशका केही स्थानमा पनि हल्का पानी पर्ने अपेक्षा गरिएको छ।
काठमाण्डौ उपत्यकामा पनि हल्का पानी पर्ने संभावना रहेको महाशाखाले जनाएको छ। उच्च हिमाली भेगहरूमा, विशेष गरी गण्डकी र बाग्मती प्रदेशका केही स्थानमा मध्यम हिमपातको पनि सम्भावना छ।
मौसमविद्ले भोलि दिउँसोबाट मौसममा सुधार आउने र पानी पर्न रोकिएपछि चिसो थप बढ्ने संकेत दिएका छन्। यसकारण, चिसोबाट बच्न र सावधानी अपनाउन मौसमविद्ले आग्रह गरेका छन्।
