गजल

✍️सागर भट्ट    (डोटी)

बाढी र डोजरले सुकुम्बासीलाई पाताल पुर्याएको छ
बैंकको लिलामीले कसैको घरमा हड्ताल पुर्याएको छ

देखेर हालत दाउरेले नि साँचेर राख्यो सम्पत्ति
आज उसकै चिर्पटले उसलाई अस्पताल पुर्याएको छ

भागदौड़ पैंसाको हो महोदय! ग्राहकले ऐना हेर्न भ्याएको छैन
उता हजामले चोर बजार उसको कपाल पुर्याएको छ

मान्छे हो मान्छेलाई फर्जी भिषामा मरूभूमी पुर्याउने
अबोध पशुले त पर्यटकलाई हिमताल पुर्याएको छ

भोकले नदी र बगरलाई पनि जोडिदिन्छ हेर्नुस् त
शिकारीले किनार बाटै भुमरीमा जाल पुर्याएको छ

(सागर भट्ट समसामयिक विषयमा केन्द्रित रही गजल लेख्नुहुन्छ।)