कैलाली, – कैलालीको लम्कीचुहा नगरपालिका–३ चिसापानीस्थित प्याराडाइज होटलमा १ किलो ७०६ ग्राम लागुऔषध (अफिम)सहित दुई जनालाई प्रहरीले पक्राउ गरेको छ।
विशेष सूचनाका आधारमा लागुऔषध नियन्त्रण ब्युरो शाखा कार्यालय महेन्द्रनगर र ईलाका प्रहरी कार्यालय चिसापानीबाट खटिएको संयुक्त प्रहरी टोलीले सो होटलमा चेकजाँच तथा खानतलासी गरेको थियो। खानतलासीको क्रममा होटलको एक कोठामा शंकास्पद रूपमा बसिरहेका दुई जनाको साथबाट १ किलो ७०६ ग्राम अफिम फेला परेको हो।
पक्राउ पर्नेहरू जुम्ला जिल्ला गुठीचौर गाउँपालिका–४ निवासी ३८ वर्षीय मेघराज खत्री र जाजरकोट जिल्ला बारेकोट गाउँपालिका–३ निवासी ३२ वर्षीय भक्तबहादुर शाही रहेको प्रहरीले जनाएको छ। उनीहरूलाई ईलाका प्रहरी कार्यालय लम्कीको हिरासतमा राखी थप अनुसन्धान भइरहेको जिल्ला प्रहरी कार्यालय कैलालीले जनाएको छ।
