सुजङ्ग अस्पताल राजपुर डोटीले सञ्चालन गरेको एक दिने स्वास्थ्य शिविरमा दुई सय ५२ जना महिला विरामीहरुले सेवा लिएका छन् ।
अस्पतालले हरितालिका तिजको अवसर पारेर बुधबार महिलाहरुका लागि निःशुल्क स्वास्थ्य शिविर सञ्चालन गरिएको थियो ।
शिविरमा दुई सय ५२ जना महिलाहरुले स्वास्थ्य सेवा लिएको अस्पतालका प्रशासन प्रमुख अर्जुन बलायरले बताए । जसमध्य एक सय ५४ जना महिलाहरुको पाठेघरको जाँच गरिएको थियो । एक सय ९५ जनाको भिडियो एक्सरे, अल्ट्रासाउण्ड गरिएको थियो । अधिकांश विरामीले पाठेघरको जाँचसँगै भिडियो एक्सरे, अल्ट्रासाउण्ड दुबै सेवा लिएका थिए ।
यो वाहेक विरामीहरुको रगत, पिसाव, प्रेसर लगायतको स्वास्थ्य जाँच, निःशुल्क औषधी वितरण गरिनुका साथै स्वास्थ्य परामर्श दिइएको थियो । अस्पतालमा स्वास्थ्य जाँच गरेका १७ जना महिलाहरुको पाठेघरको अप्रेस गर्नुपर्ने जटिल अवस्था देखिएको अस्पतालले जनाएको छ ।
सुजङ्ग अस्पतालमा कार्यरत वरिष्ठ सर्जन डक्टर सुवाष थापा मगर, हाडजोर्नी तथा नसा रोग विशेषज्ञ डक्टर सुरेन्द्र कुमार चौधरी र एमविविएस डक्टर राजमणी यादव लगायतको टिमले स्वास्थ्य सेवा दिएका थिए ।
सुजङ्ग अस्पतालले तिजको अवसर पारेर गत वर्ष पनि शिविर सञ्चालन गरेको थियो । अस्पतालले समय समयमा अस्पताल तथा अस्पताल बाहिर स्वास्थ्य शिविरको आयोजना गर्दै आएको छ । शिलाखबर
