डडेल्धुरा। डडेल्धुरामा भएको जीप दुर्घटनामा दुई जनाको घटनास्थलमै मृत्यु भएको छ भने सात जना घाइते भएका छन्।
पर्शुराम नगरपालिका–९ स्थित दैजी–जोगबुढा सडकखण्डको लिप्रामा लु १ ज ४५७९ नम्बरको जीप दुर्घटनाग्रस्त भएको हो। महेन्द्रनगरबाट सलेता जाँदै गरेको जीप सडकबाट करिब ३० मिटर तल खसेको इलाका प्रहरी कार्यालय जोगबुढाले जानकारी दिएको छ।
दुर्घटनामा ज्यान गुमाउने दुवै महिला रहेको र उनीहरूको पहिचान खुल्न बाँकी रहेको जनाइएको छ। घाइते सात जनामध्ये चार जनाको अवस्था गम्भीर रहेको र उनीहरूलाई थप उपचारका लागि धनगढी पठाइएको छ।
घटनाको अनुसन्धान भइरहेको प्रहरीले जनाएको छ। यस सडकखण्डमा दुर्घटनाका घटनाहरू दोहोरिरहेकाले यात्रु र सवारीचालकलाई थप सतर्कता अपनाउन आग्रह गरिएको छ।
