धनगढी। कैलालीको बर्दगोरिया गाउँपालिका–२ बौनियामा रहेको गोदाममा मंगलबार राति आगलागी हुँदा तीन जना घाइते भएका छन्।
द्वारिकाप्रसाद धमलाको चार तले घरको दोस्रो तलामा रहेको कपडा र इलेक्ट्रोनिक सामानको गोदाममा आगलागी भएको थियो। आगो निभाउने क्रममा ८२ वर्षीय घरधनी मुक्तिप्रसाद धमला, ३९ वर्षीय टेकराज जोशी, र बौनियामा कार्यरत प्रहरी जवान टंकध्वज मगर घाइते भएका हुन्।
जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) कबिन्द्रसिंह बोहराका अनुसार जोशी र प्रहरी जवान मगरको हात र मुख जलेको छ। घाइतेहरूको स्थानीय अस्पतालमा उपचार गरी डिस्चार्ज गरिएको छ।
आगलागीबाट करीब ७० लाख रुपैयाँ बराबरको क्षति भएको अनुमान गरिएको छ। आगो घोडाघोडी, लम्कीचुहा, र टीकापुर नगरपालिकाका दमकलहरूको सहयोगमा राति करीब १० बजेतिर नियन्त्रणमा लिइएको थियो।
आगलागीको कारण खुल्न सकेको छैन भने यसबारे थप अनुसन्धान भइरहेको प्रहरीले जनाएको छ।
