डोटी । डोटीको जोरायल गाउँपालिका–१ गैरा बजारस्थित भीमदत्त राजमार्गमा इभी भ्यान दुर्घटना हुँदा दुई जना घाइते भएका छन्।
सुदूरपश्चिम प्रदेश ०१-००१ ज १६६६ नम्बरको इभी भ्यान कैलालीको धनगढीबाट अछामको चौखुट्टेतर्फ जाँदै गर्दा दुर्घटनामा परेको हो। जिल्ला प्रहरी कार्यालय डोटीका अनुसार सोही दिशामा गइरहेको हाईसलाई ओभरटेक गर्ने क्रममा दुर्घटना भएको हो।
धनगढी उपमहानगरपालिका–३, बोराडाँडीका २६ वर्षीय सुरज बोहराले चलाएको उक्त भ्यानमा आठ जना सवार थिए। तीमध्ये दुई जना घाइते भएका छन् भने अन्य छ जना सकुशल रहेका छन्।
घाइतेहरूमा एक अन्दाजी २२ वर्षीया महिला (पहिचान खुल्न बाँकी) र डोटीको शिखर नगरपालिका–८, तिलतालीका चक्र बलायर रहेका छन्। दुवै जनालाई उपचारका लागि डडेलधुरा अस्पताल पठाइएको प्रहरीले जनाएको छ।
