पोखरा – राष्ट्रिय स्वतन्त्र पार्टीका सभापति रवि लामिछानेलाई म्याद थपका लागि आज जिल्ला अदालत कास्कीमा उपस्थित गराइएको छ। सहकारी ठगी, सम्पत्ति शुद्धीकरण, र सङ्गठित अपराधको आरोपमा अनुसन्धान भइरहेका लामिछानेलाई यसअघि थपिएको म्याद सकिएपछि पुनः अदालतमा पेश गरिएको हो।
कास्की प्रहरीले लामिछानेविरुद्धको अनुसन्धान पूरा गरी सरकारी वकिल कार्यालयमा प्रतिवेदन बुझाइसकेको जनाएको छ। प्रहरीका अनुसार लामिछानेमाथि सहकारी ठगीसँगै विभिन्न जिल्लामा अनुसन्धान र बयानका क्रममा नयाँ तथ्यहरू उजागर भएका छन्।
रवि लामिछाने २ कात्तिकमा काठमाडौँबाट पक्राउ परेका थिए। त्यसयता उनी कास्की प्रहरी हिरासतमा छन्। अनुसन्धानका क्रममा उनलाई रुपन्देही, काठमाडौँ, चितवन र पर्सा जिल्ला पुर्याएर बयान लिइएको थियो।
