कैलालीको गोदावरी नगरपालिका वडा नं. १ मा लागू औषधको कारोबार भइरहेको सूचनाका आधारमा प्रहरीले एक युवकलाई हेरोइनसहित पक्राउ गरेको छ। मंगलबार साँझ ६:३० बजे जिल्ला प्रहरी कार्यालय कैलाली, इलाका प्रहरी कार्यालय मालाखेती, र लागू औषध नियन्त्रण ब्यूरो शाखा कार्यालय धनगढीको संयुक्त टोलीले युवकलाई पक्राउ गरेको हो।
पक्राउ पर्नेमा गोदावरी नगरपालिका वडा नं. १ का २९ वर्षीय बिरेन्द्र चौधरी रहेको प्रहरीले जनाएको छ। प्रहरीको टोलीले चौधरीलाई संकास्पद गतिविधि गरिरहेको अवस्थामा नियन्त्रणमा लिई खानतलासी गर्दा २१० मिलिग्राम हेरोइन बरामद गरेको जनाएको छ।
